Է˜Յ, ԼԱ´Վ ԿԵՆԱՔ, ԱԿԱ´ՆՋ ԱՐԵՔ...
12. 03. 2021 -ին 8ա դասարանում ամփոփեցին <<Հովհաննես Թումանյան>> թեման: Որոշեցին, որ պետք չէ սահմանափակվել միայն ծրագրային նյութերով: Ստեղծագործողին, նրա մտածելակերպը հասկանալու համար պետք է ուսումնասիրել նաև այն միջավայրը, պայմանները, պատմական ժամանակաշրջանը, որում նա ապրել է: Սովորողները նախապես ստացել էին հանձնարարություն` խմբեր ստեղծել և ընտրել որևէ բաժին ու ուսումնասիրել: Բաժինները որոշեցինք դասարանում`Լոռվա բնաշխարհ, Թումանյանն ընտանիքում, Թումանյանի մանկությունն ու պատանեկությունը, Թումանյանն ու երաժշտությունը, Ամենայն հայոց թամադան, Թումանյանն ու 1915-ը և այլն: Աշխատել էին խմբերով կամ առանձին: Օրինակ, Տիգրանն ուսումնասիրել էր Թումանյանի հանելուկները և ստեղծել սեղանի խաղ, որը հենց տեղում փորձարկեցին: Հետաքրքիր էր նաև խոհանոցային բաժինը: Պատանի խոհարարներ Անուշիկն ու Միլենան նախապես այցելել էին Թումանյանի թանգարան, հետաքրքրվել Լոռվա խոհանոցով, գրողի սիրած կերակրատեսակներով, այն ամենով, ինչ գերիշխում էր նրանց տանը հյուրասիրությունների ժամանակ /իսկ Թումանյանի օջախը հայտնի էր իր հյուրընկալությամբ/: Նյութերը հավաքելուց, մշակելուց հետո նրանք դասընկերներին փոխանցեցին իրենց գիտելիքը, ապա տեղում պատրաստեցին նրա սիրած նախաճաշը` ռեժանով, սպանախով ձվածեղ, հյուրասիրեցին ուրցով թեյ, ունապ: Երաժշտական բաժինը հիացրեց իր մանրամասն ուսումնասիրություններով` ովքե՞ր են <<Անուշ>>-ը, <<Թմկաբերդի առումը>> վերածել օպերաների, ովքե՞ր են առաջին դերակատարները և այլն: Հետո սահիկահանդեսով ստեղծեցին մի յուրահատուկ կապ մարդու անատոմիայի և Թումանյանի տարիների միջև: Թումանյանի կյանքը մի խումբը ներկայացրեց քարտեզով, որն ուներ իր պայմանական նշանները: 10 զավակերի կյանքը ներկայացվեց գրպանիկներով պաստառի միջոցով: Իսկ դասն ավարտեցինք թումանյանական լավատեսությամբ` երգելով` ու պիտի գա հանուր կյանքի արշալույսը վառ հագած.... Ամփոփիչ դասն արդյունավետ էր. սովորողները, օգտագործելով դասագիրքն ու ուսունական այլ աղբյուրներ, մանրամասն ուսումնասիրեցին նրա կյանքն ու ստեղծագործությունները /նաև ոչ ծրագրային/ ու տվեցին իրենց բանաձևը, թե ինչու է Թումանյանն Ամենայն հայոց բանաստեղծ:
