Էստի համեցե՛ք, բարով համեցե՛ք...
Երևանի հ.186 հիմնական դպրոցում փետրվարի 19-ին տոնական իրարանցում էր։ Վաղ առավոտից դպրոցի շքամուտքի մոտ Հովհաննես Թումանյանի հեքիաթների, բալլադների հերոսները դիմավորում էին աշակերտներին, ուսուցիչներին և <<Էստի համեցեք>>ով հրավիրում ներս։ Դպրոցում թումանյանական շունչն էր թևածում: Մայրենիի ուսուցչուհի Հ.Կարապետյանը 5բ և 5գ դասարանների աշակերտների հետ կազմակերպել է ցերեկույթ նվիրված հայ մեծանուն բանաստեղծի ծննդյան149-ամյակին և գիրք նվիրելու օրվա տոնի առթիվ։ 5բ և 5գ դասարանների աշակերտները մեծարանքի, խոնարհումի խոսքեր ասացին բանաստեղծին: Նրանք համոզված են, որ շարունակելու են Թումանյանի ավանդույթները` հավատարիմ մնալով մարդասիրության, ազգասիրության այն սկզբունքներին, որ բերեց մեծ հայը։ Օրվա խորհուրդն ու նշանակությունը կարևորելով` դպրոցի տնօրենը խորհուրդ տվեց Գիրք շատ կարդան և գիրք նվիրեն միմյանց։
