Ո՞վ է ասել, թե ձյունը միայն սպիտակ է…
Երեխաների մտքի թռիչքը սահմաններ չունի: Գլխավորն այն է, որ պայմաններ ստեղծվեն նրանց երևակայությանը զարկ տալու և նրա հետևից գնալու… Մեր խնդիրն է երեխայի մեջ դաստիարակել մտքի քաջություն, որոնողական աշխատանք իրականացնելու կամք, ինքնուրույնություն, ներշնչել համագործակցության ոգի, անկաշկանդ ստեղծագործելու մղում… 5ա դասարանում ստեղծագործական մտքի զարգացման մայրենիի այս դասն անցկացրինք դրսում: <<Այդ ո՞վ է ասել, թե ձյունը միայն սպիտակ է…>> թեման է: Անհամբեր սպասում էինք ուրբաթ օրվան. պայմանավորվել էինք, որ մեր <<զենքերով>>` զանազան գույներ, անհրաժեշտ պարագաներ, գունավոր ձյունից ստանալու ենք ծաղիկներ, տորթեր, գարնանային ձնեմարդ և այլն: Ճիշտն ասած, մեկ-երկու օրվա արևոտ եղանակը մեզ և´ ուրախացրեց, և´ անհանգստացրեց. հանկարծ ձյունը չհալվի՞: Բարեբախտաբար թե դժբախտաբար, ցուրտ էր, ձյունն էլ` իր տեղում: Ստացանք… մի տեսակ… նախագարնանային ուրախ ձյուն: Թող յուրաքանչյուր մարդ իր ուզած գույներով լցնի իր շրջապատը. թող գունագեղ լինի բոլորիս կյանքը:
